Glerárskóli Akureyri

Við í Glerárskóla erum þátttakendur í alþjóðlega verkefninu Göngum í skólann. Verkefnið hefst mánudaginn 6. september og þann dag hlaupa allir Skarðshlíðarhringinn og er tilefnið Norræna skólahlaupið.

Næstu tvær vikurnar verður sérstök áhersla á að allir nemendur í 1. -4. bekk komi gangandi í skólann. Nemendur í 5. -10. bekk mega koma gangandi eða hjólandi.

Þeim bekkjum sem standa sig vel verður veitt viðurkenning. Markmið verkefnisins samræmast vel skólasýn okkar og umhverfisstefnu og eru meðal annars:

• Hvatning til aukinnar hreyfingar með því að auka færni barna til að ganga á öruggan hátt í skólann og fræða þau um ávinning reglulegrar hreyfingar.

• Að draga úr umferðarþunga, mengun og hraðakstri nálægt skólum.

• Vitundarvakning um hversu „gönguvænt“ umhverfið er og hvar úrbóta er þörf.

• Vitundarvakning um ferðamáta og umhverfismál.

01.09.2010

Leitin að grenndargralinu 2010

Leitin að grenndargralinu hefst mánudaginn 6. september. Þetta er í fyrsta skipti sem nemendur í 8.-10. bekk í Glerárskóla eru þátttakendur í leitinni að hinu eftirsóknaverða grali.

Hugmyndin að verkefninu fæddist í Giljaskóla sumarið 2008 og um haustið hófu nemendur skólans leit að grenndargralinu í fyrsta skipti. Árið 2009 tók Síðuskóli þátt og nú hefur Glerárskóli bæst í hópinn. Nemendur Glerárskóla eru boðnir velkomnir til leiks.

Þrautir verða settar upp á vissum stað í skólunum þremur eins og tíðkast hefur. Þær koma upp eftir hádegi á mánudögum. Heimasíða Leitarinnar hefur verið tekin í notkun en þar má jafnframt nálgast þrautirnar og annað sem þeim tilheyrir auk almennra upplýsinga um verkefnið. Slóðin er www.grenndargral.is.

Framundan eru 10 vikur fullar af spennandi viðfangsefnum og ljóst að keppnin harðnar með hverju árinu. Við viljum hvetja foreldra og aðra sem koma að uppeldi þeirra sem taka þátt í Leitinni til að aðstoða þau við úrvinnslu þrautanna. Leitin er góður vettvangur fyrir fjölskylduna að koma saman og vinna að sameiginlegu verkefni þar sem allir geta fundið eitthvað við sitt hæfi. Allir geta tekið þátt.

Umsjónarmenn verkefnisins eru Brynjar Karl Óttarsson kennari í Giljaskóla, Helga Halldórsdóttir kennari í Glerárskóla og Sigrún Sigurðardóttir kennari í Síðuskóla.